Çinin ByteDance şirkətinə məxsus sosial şəbəkə TikTok, qlobal miqyasda kadr ixtisarlarına başlayıb. Məlumatlara görə, işdən azad edilənlərin sayı dünya üzrə yüzlərlədir və ən çox təsir Malayziyada hiss olunub.
Qərarın səbəbləri
Bu dəyişikliklərin əsas səbəbi kontentin moderasiyasında süni intellektin (AI) geniş tətbiq olunmasıdır. TikTok-un verdiyi açıqlamaya əsasən, platformada qaydaları pozan və ya arzuolunmaz məzmunun 80%-dən çoxu artıq AI vasitəsilə silinir. Malayziyada bu qərar nəticəsində 700-dən çox işçi ixtisara düşsə də, şirkət daha sonra bu rəqəmin 500-dən az olduğunu bildirib. İşdən çıxarılanların böyük hissəsi kontent moderasiyası ilə məşğul olan işçilər olub və onlara bu barədə elektron poçt vasitəsilə məlumat verilib. TikTok izah edib ki, bu addım qlobal məzmun moderasiya sistemini optimallaşdırmaq və təkmilləşdirmək üçün zəruri olub.
Gələcək planlar
Bununla yanaşı, şirkət bu il platformada etibar və təhlükəsizliyi gücləndirmək üçün qlobal səviyyədə təşəbbüslərə 2 milyard dollar sərmayə qoymağı planlaşdırır. Bu addımlar, xüsusilə Malayziyada irq, din və monarxiya kimi həssas mövzularla bağlı məzmunun daha ciddi moderasiyasını tələb edən tənzimləyicilərin artan təzyiqi fonunda atılır.