Tesla-nın baş direktoru Elon Musk “We, Robot” tədbirində iki tamamilə avtonom nəqliyyat vasitəsi – Cybercab və Robovan-ı təqdim edib. Bu avtomobillər sükan və pedallar olmadan dizayn edilib, bu da onları tamamilə pilotsuz edir. Kütləvi istehsaldan əvvəl bu texnologiyalar tənzimləyici qurumlardan təsdiq almalıdır və Tesla onları yaxın bir neçə il ərzində istifadəyə verməyi planlaşdırır.
Cybercab — iki nəfərlik futuristik avtomobil
Cybercab futuristik görünüşə malik elektrik avtomobilidir və elmi fantastika filmlərindən ilhamlanmış dizaynla seçilir. Avtomobilin qapıları yuxarıya doğru açılır və şarj üçün induktiv texnologiyadan istifadə olunur. Avtomobildə ənənəvi idarəetmə elementləri yoxdur və salon yalnız iki nəfərlikdir. Tesla-nın iddiasına görə, belə robotaksilərdə səyahət adi ictimai nəqliyyatdan xeyli ucuz olacaq — təxminən hər kilometrə 20 sent.
Robovan — 20 nəfərlik tamamilə avtonom marşrut avtobusu
Robovan, eynilə Cybercab kimi, sükan və pedalsızdır və simsiz şarj texnologiyasını dəstəkləyir. Bununla belə, Robovan-ın əsas üstünlüyü onun geniş tutumudur — bu marşrut avtobusu 20 sərnişin daşımaq qabiliyyətinə malikdir və bu, onu şəhər nəqliyyatı üçün ideal həll edir.
Tam avtonom idarəetmənin gələn il istifadəyə verilməsi planlaşdırılır
Tesla gələn ildən Texas və Kaliforniyada tam avtonom idarəetmə funksiyasını istifadəyə verməyi planlaşdırır. Musk-ın sözlərinə görə, Cybercab-ın kütləvi istehsalına 2026–2027-ci illərdə başlanılacaq. O, həmçinin bu cür pilotsuz nəqliyyat vasitələri insanların idarə etdiyi avtomobillərdən 10-20 dəfə daha təhlükəsiz olacağını qeyd edib.
Tesla-nın yeni nəsil köməkçi robotları
Bundan əlavə, Tesla Optimus adlanan köməkçi robotlarını da təqdim edib. Bu robotlar gündəlik işləri yerinə yetirə biləcək, məsələn, bağlamaları qəbul etmək və uşaqlara nəzarət etmək kimi tapşırıqları icra edəcəklər. Elon Musk robotları Tesla avtomobillərinə bənzədib, lakin “təkərlər əvəzinə əlləri və ayaqları var” deyib. Robotların qiymətinin 20-30 min dollar arasında olması planlaşdırılır, bu da onları bir çox ailələr üçün əlçatan edəcək.